Radio Makalu 102.1 MHz

काठमाडौं,भदौ १३ गते । नेपालमा प्यासेन्जर कारको बजार हिस्सा बढाउन आक्रामक बन्दै गएको टाटा मोटरले नयाँ ह्याचब्याक गाडी टियागो सार्वजनिक गरेको छ ।

सामान्यतयाः कमर्सियल भेहिकलमा एक्सपर्ट मानिने टाटाले पछिल्ला दुई बर्षयता आफ्ना प्यासेन्जर कारलाई बिश्वस्तरीय ब्राण्डसँग प्रतिस्पर्धा गर्नेगरी तयार पारिरहेको छ । इञ्जिन, पर्फमेन्स, डिजाइन, सुविधा लगायतका सवै पक्षमा टाटाले टियोमार्फत आफुलाई पुनः परिभाषित गर्ने कोसिस गरेको छ ।

बोल्ट र जेस्टजस्ता पछिल्ला मोडलमा टाटाले आफुलाई सुविधा र इन्जिनमा अब्बल सावित गरिसकेको छ । नयाँ ह्याचब्याक टियागोमार्फत् टाटाले डिजाइनमा पनि नयाँ बेञ्चमार्क सेट गरेको छ । स्र्पोटी लुक्सको गाडीलाई नेपाली उपभोक्ताले निकै रुचाउने कम्पनीको विश्वास छ ।

डिजाइन

यसअघिको इन्ट्री लेभल ह्याचब्याक इण्डिकालाई रिप्लेस गर्नेगरी ल्याइएको हो टियागो । यसअघिका कुनैपनि कारमा नभएको डिजाइन दर्शनअनुसार यो कारलाई तयार पारिएको छ ।


जसका कारण झट्ट हेर्दा तपाइँलाई यो कार टाटाकै उत्पादन हो भन्ने नलाग्न सक्छ । अग्रभाग र पछाडीतिरको डिजाइनमा निकै मेहेनत गरेको देखिन्छ । इन्ट्री लेभल ह्याचब्याक भएपनि डिजाइनका कारण पि्रमियम ह्याचब्याकको झल्को दिन्छ ।

यसले टाटाका उत्पादनहरुमा नयाँ डिजाइन ट्रेन्ड सेट गरेको छ । यो मोडल टाटाका अन्य मोडलभन्दा योङ र फ्रेस लाग्छ ।

इन्टेरियर डिजाइनमा पनि टियागोमा धेरै फरकपन देख्न सकिन्छ । कालो र खैरो मिश्रति ड्यासबोर्ड र आर्कषक क्याबिन डिजाइन झट्ट आँखा तान्छ । सेन्टर कन्सोलमा बोल्टकै जस्तो इन्फोटेन्मेन्ट सिस्टम रहेको छ । जुन यो सेगमेन्टका अन्य प्रतिस्पर्धीभन्दा धेरै उन्नत हो ।

स्टेयरिङ र इन्स्ट्रुमेन्ट कन्ट्रोलमा धेरैजसो पि्रमियम ह्याचब्याक बोल्टकै फिचर राखेर टाटाले प्रतिस्पर्धामा अगाडी देखिन खोजेको छ । भित्री भाग स्पेशियस छ, इन्टेरियर अघिल्ला कारभन्दा निकै भिन्न छ ।

इञ्जिन


टाटाले टियागोलाई पेट्रोल र डिजेल दुवै इन्जिनमा ल्याएको छ । १२ सय सीसी क्षमताको तीन सिलिण्डरयुक्त इन्जिन अन्य इन्ट्री लेभल ह्याचब्याकभन्दा निकै पावरफुल छ । यसमा १.२ लिटरको पट्रोल इञ्जिन छ ।

हुण्डाईको ग्राण्ड आईटेन र सुजुकी सेलेरियोभन्दा पनि इन्जिन शक्तिशाली रहेको कम्पनीको दावी छ । यसमा इको र सीटी गरी दुई मोडमा इन्जिन चलाउन सकिन्छ । बोल्टमा जस्तो स्पोर्ट मोड भने छैन् ।

मूल्य

तीन वटा भेरियन्टमा उपलब्ध हुने कार ६ वटा कलरमा रहेको छ । एक्सइ, एक्स एम र एक्सजेड भरेयिन्टकाम कार नेपाल आएको छ ।


टियागो स्ट्राइकर ब्ल्यू, बेरी रेड, सनब्रस्ट अरेन्ज, एक्प्रेसो ब्राउन, पर्लसेन्ट हृवाइट र ल्पाटिनम सिल्भर कलरमा उपलब्ध हुने कम्पनीले जनाएको छ ।

यो कारको प्रारम्भिक मूल्य २२ लाख ५५ हजार रुपैयाँ छ । जसमा एक्सइ भेरियन्टको मूल्य २२ लाख ५५ हजार रुपैयाँ तोकिएको छ भने एक्सएमको २५ लाख ५५ हजार र एक्स जेटको मूल्य २८ लाख ५५ हजार रुपैयाँ निर्धारण गरिएको छ ।

सुविधा

यो गाडीमा १७० मिलिमिटरको ग्राउण्ड क्लेयरेन्स दिइएको छ । पि्रमियम इन्टेरियर डिजाइन भएको टियागोमा क्रोम ह्याण्डल, निटेड फ्याबि्रक, कलर हार्मेनी, ड्युल टोल इन्टेरियर लगायतले गाडी सुसज्जित छ । यसैगरी सुरक्षाका लागि फ्रन्ट एयर ब्याग, अत्याधुकिन एबीएस, इबीडी कर्नर स्टेलिबिलिटी कन्ट्रोल छ ।


यो सहित इन्फोटेन्मेन्ट डिस्प्ले, रियर पार्किङ सेन्सर, इनर्जी अब्र्जभिङ बडी पनि यसमा छ । यस्तै यसमा ४ वर्षको वारेन्टी दिइएको छ । यसले प्रतिलिटर २३.८४ किलोमिटर माइलेज दिने कम्पनीको दावी छ ।

प्रतिस्पर्धा

डिजाइन, मूल्य र सुविधाका आधारमा भन्दा टाटाको टियागोले सुजुकी स्वीफ्ट र हुण्डाई ग्राण्ड आई-टेनसँग नेपाली बजारमा प्रतिस्पर्धा गर्नुपर्ने हुन्छ । स्वीफ्ट र ग्राण्ड आइटेनले नेपाली बजारमा यसअघि नै हजारौंको मन जितिसकेको हुँदा टियागोले सो श्रेणीका ग्राहकलाई तान्न मेहेनत गर्नुपर्ने छ ।


तर, जुन पैसामा टाटाले इन्ट्री लेभलको ह्याचब्याक ल्याएको छ, र जसअनुसार फिचरहरु दिएको यसले उपभोक्ताको मन जित्न त्यति कठिन भने छैन् ।

टाटाको विश्वास

टाटा मोटरले आफ्नो उत्पादनलाई बिश्वब्यापी मापदण्डको बनाउन कुनै कसर बाँकी छाडेको छैन् । बाह्य डिजाइन, इन्टेरियर, इन्जिन पर्फमेन्स र विश्वसनियता लगायत सवै सूचकमा टाटाले निकै धेरै सुधार र मेहेनत गरेको देखिन्छ । नेपालमा टाटा मोटरले कार सेगमेन्टमा आफ्नो बजार हिस्सा बढाउन यो मोडल निणर्ायक हुनसक्छ ।


खासगरी मूल्य, पाटपूर्जाको उपलब्धता र बिशाल नेटवर्कका कारण नेपाली ग्राहकहरु तुलनात्मक रुपमा भारतीय गाडीप्रति बढी विश्वस्त देखिन्छन् । युरोपेली, जापानी तथा कोरियन गाडीसँग प्रतिस्पर्धा गर्नेगरी आएको टाटाको टियागोले यी अतिरिक्त पक्षका कारण पनि आफ्ना बजार हिस्सा बढाउने देखिन्छ ।-अनलाइनखबरबाट

पर्सा,भदौ १३ गते । सशस्त्र वनरक्षक र तस्करबीच पर्सामा गएराति दोहोरो गोली हानाहान भएको छ । पर्साको मधुवनमथवल वन क्षेत्रमा गएराति वन फँडानी गर्ने तस्करलाई रोक्न खोज्दा दोहोरो गोली हानाहान भएको हो ।


नियमित गस्तीमा रहेको इलाका वन कार्यालय बढनियारको वन रक्षकमाथि राति १ बजेको समयमा तस्करले गोली चलाएको पर्साका प्रमुख जिल्ला अधिकारी केशवराज घिमिरेले जानकारी दिए ।

बढनिहार रेन्जपोस्टका जमदार प्रदीप तिमिल्सिनाको नेतृत्वमा गएको वनरक्षकको टोलीले रूख फँडानी गरिरहेकालाई रोक्न खोज्दा तस्करवाट रक्षकलाई नै लक्षित गरी चार राउन्ड गोली प्रहार गरिएको र सोको प्रतिकारमा रक्षकबाट तीन राउन्ड गोली प्रहार भएको उनले बताए ।

प्रजिअ घिमिरेका अनुसार, तस्कर र वनरक्षकबीच भएको दोहोरो गोली हानाहानमा कुनै मानवीय क्षति नभएको र बनरक्षकले घटनास्थलबाट फँडानी गरिएका चार थान सालको काँचो गोलाइ, वन फँडानीमा प्रयोग गरिएका दुई थान आरा एवम् चार थान साइकल बरामद गरेका छन् । घटनामा संलग्न रहेकाको खोजी कार्य भइरहेको पनि उनले बताए ।

बरामद गरिएको आरा, साइकल र काठलाई आवश्यक कानुनी कारबाहीका लागि इलाका वन कार्यालय बढनिहारमा राखिएको प्रहरीले जनाएको छ ।-रासस

काठमाडौ, भदौ १३ गते । निर्वाचन आयोगले निकट भविष्यमा हुने स्थानीय तहको निर्वाचनका लागि कानुन बनेपछि पनि कम्तीमा ६ महिना समय चाहिने बताएको छ ।

स्थानीय तहको निर्वाचन विशेष प्रकारको निर्वाचन भएकाले कम्तिमा पनि तयारीका लागि छ महिना समय लाग्ने बताएको हो ।

आयोगले आइतबार गृह मन्त्रालय मार्फत सरकारलाई क्षेत्र निर्धारण आयोगको प्रतिवेदन आएर सबै कानुन उपलब्ध भएको मितिले पनि कम्तिमा ६ महिनाको समय तयारीका लागि चाहिने जानकारी गराएको हो ।

‘स्थानीय निकायको हकमा एकसय वीस दिनको कुरा गरेका हौं,’ गृहमन्त्रालयसँग भएको कुराकानीबारे अनलाइनखबरलाई जानकारी दिँदै एक पदाधिकारीले भने, ‘स्थानीय तह नयाँ संरचना भएको र त्यहि अनुसार मतदान केन्द्र तोक्ने, निर्माण गर्ने र नयाँ संरचना अनुसार मतदाता नामावली समेत व्यवस्थापन गर्नुपर्ने हुन्छ ।’

यी सबै तयारी गर्न कम्तिमा पनि ६ महिना चाहिने आयोगको माग छ ।

यस्तै निर्वाचन आयोगले आइतबार क्षेत्रनिर्धारण आयोगका पदाधिकारीसँग पनि छलफल गरेको छ । छलफलमा आयोगले नयाँ संंरचनामा निर्वाचन गर्नुपर्ने भएकाले आयोगको प्रतिवेदन चाँडो चाहिने बताएको थियो ।

निर्वाचन अयोगको कार्यालयमा भएको छलफलमा प्रमुख निर्वाचन आयुक्त अयोधिप्रसाद यादवले क्षेत्र निर्धारण आयोगको प्रतिवेदन र आवश्यक कानूनहरु स्वीकृत भएपछि पनि करिब ६ महिना समय चाहिने बताएका हुन् ।-अनलाइनखबरबाट

इलाम, भदौ १३ गते । इलामको एकतप्पा गाविसमा रु छ करोड ४० लाखको लागतमा पक्की कुलोको निर्माण कार्य सुरू भएको छ । सिँचाइ विकास डिभिजन कार्यालय इलामबाट कुलो निर्माण सुरू भएपछि एकतप्पावासी खुसी भएका छन् ।विगतमै यो कुलो निर्माण हुनुपर्ने भए पनि यसपालिदेखि कुलो बन्न सुरू गरेको उपभोक्ता समितिका अध्यक्ष दिलबहादुर योङहाङले बताउनु भयो । देउमाई नगरपालिका र एकतप्पा गाविसबीचमा पर्ने ह्वेङ्मा खोलाबाट देउमाई ह्वेङ्मा खोला सिँचाइ कुलोले एकतप्पाका केही वडाबाहेक सबै वडामा सिँचाइ हुने भएको छ ।

१२।१ किलोमिटर लामो सिँचाइ कुलोले एकतप्पा गाविसका १, २, ६, ७, ८ र ९ नम्बर वडाका एक हजार ५०० घरधुरी लाभान्वित हुने उपभोक्ता समितिका सचिव रामजी कोइरालाले जानकारी दिनुभयो । तीन वर्षभित्र निर्माण सम्पन्न गरिसक्ने बताइएको छ । कुलोले एकतप्पाका छ वडाको ५०० रोपनीभन्दा बढी जग्गा सिञ्चित हुने भएको छ ।

एकाउन्न लाख राजस्व सङ्कलन

जिल्ला ट्राफिक कार्यालय इलामले गत आव २०७२÷७३ मा सवारीनियम उल्लङ्घन गर्ने सवारीसाधनबाट रु ५१ लाख ७० हजार ३५० राजस्व सङ्कलन गरेको छ ।

ट्राफिकले जिल्लाका विभिन्न स्थानमा नियमविपरीत सञ्चालन भएका जिप, मोटरसाइकल, बस, ट्रक, ट्र्याक्टरलगायत १५ हजार ६२८ वटा सवारीसाधनलाई कारबाही गरी उक्त राजस्व सङ्कलन गरेको हो ।

सवारी नियम पालना नगर्ने जिप, कार र भेन छ हजार ७२, ट्रक एक हजार ८५४, बस २६७, मोटरसाइकल छ हजार २५३ र ट्र्याक्टर एक हजार १७३ वटा कारबाहीमा परेको ट्राफिक इञ्चार्ज पदमबहादुर राईले जानकारी दिनुभयो । रासस

काठमाडौं, भदौ १३ गते । प्रधानमन्त्री पुष्पकमल दाहाल ‘प्रचण्ड’ले महान्यायाधिवक्ताको कार्यालय र मातहतका निकायमा देखिएको समस्या समाधानका लागि सरकारले आवश्यक सहयोग गर्ने बताउनुभएको छ ।

रामशाहपथस्थित महान्यायाधिवक्ताको कार्यालयको आइतबार स्थलगत अवलोकनपछि उहाँले यस्तो बताउनुभएको हो । प्रधानमन्त्री प्रचण्डले त्यस कार्यालयमा देखिएका नीतिगत समस्या, भौतिक पूर्वाधार र वृत्ति विकासमा आवश्यक कदम चाल्ने आश्वासनसमेत दिनुभयो ।
सरकारी निकायहरूको कार्यसम्पादन किन कमजोर बनिरहेको छ भन्ने गतिलो उदाहरण महान्यायाधिवक्ताको कार्यालय भएको भन्दै उहाँले कार्यसम्पादन स्तर उच्च बनाउन सरकारका तर्फबाट आवश्यक सहयोग गर्न आफू तयार रहेको बताउनुभयो । “तपाईंहरू उच्च मनोबलका साथ काम गर्नुस्, सरकारले आवश्यक सहयोग गर्छ”, उहाँले भन्नुभयो ।
महान्यायाधिवक्ता नेपाल सरकारको मुुख्य कानुनी सल्लाहकार हुने संवैधानिक व्यवस्था छ । त्यस क्रममा महान्यायाधिवक्ता रमण श्रेष्ठले कार्यालय र मातहतका निकायमा देखिएका समस्याहरूका बारेमा प्रधानमन्त्री प्रचण्डलाई जानकारी गराउनुभएको थियो ।
साधनस्रोतको अभाव, वृत्ति विकासको कमी, न्याय सेवाकै अन्य समूहको तुलनामा सरकारी वकिल समूह उपेक्षित रहेको, न्यायाधीश नियुक्तिमा प्राथमिकता नदिइएको र सरकारी निकायहरूले लिखित जवाफ पठाउँदा महान्यायाधिवक्ताको कार्यालय वा मातहतका सरकारी वकिलको कार्यालयसँग समन्वय नगर्ने गरेको परिणामस्वरूप सरकारी मुद्दामा असफलता प्राप्त हुने गरेको जानकारी महान्यायाधिवक्ता श्रेष्ठले गराउनुभएको थियो । प्रधानमन्त्री प्रचण्डसँगै कानुन, न्याय तथा संसदीय मामिलामन्त्री अजयशङ्कर नायक पनि अवलोकनमा हुनुहुन्थ्यो ।
बारपाकलाई पर्यटकीय स्थल बनाइने
यसैबीच राससका अनुसार प्रधानमन्त्री दाहालले २०७२ वैशाख १२ गतेको भूकम्पको केन्द्रबिन्दु गोरखाको बारपाकलाई विश्वकै आकर्षक पर्यटकीय स्थल बनाउन पहल गरिने बताउनुभएको छ ।
बारपाकका भूकम्प प्रभावितको प्रतिनिधिमण्डलसँग आइतबार बिहान प्रधानमन्त्री निवास बालुवाटारमा भेटघाट गर्दै प्रधानमन्त्री दाहालले “ऐतिहासिक गाउँ बारपाकको एकीकृत योजनाका साथ पुनःनिर्माण गर्नुपर्छ, भूकम्पको केन्द्रबिन्दु बनेको बारपाकलाई विश्वले चिनेको छ, यसलाई संसारकै आकर्षक पर्यटकीय केन्द्र बनाउन पहल
गर्नेछु” भन्नुभयो ।

गोरखाका सांसदद्वय कृष्ण धिताल र छमबहादुर गुरुङ एवं पूर्व सांसद अम्बर गुरुङको नेतृत्वमा आएको टोलीले प्रधानमन्त्री दाहाललाई ज्ञापनपत्र पेस गर्दै जिल्लाको विकास निर्माणमा ध्यान दिन अनुरोध गरेको स्वकीय उपसचिव मनोहरि तिमल्सिनाले जानकारी दिनुभयो ।
त्रिविका गतिविधिबारे जानकारी
यसैबीच त्रिभुवन विश्वविद्यालयका पदाधिकारीले आइतबार प्रधानमन्त्री दाहालसँग सिंहदरबारमा भेट गरी विश्वविद्यालयको वर्तमान अवस्थाबारे जानकारी गराएका छन् ।
विश्वविद्यालयका उपकुलपति डा. तीर्थराज खनियाँको नेतृत्वमा गएको टोलीले त्रिविका कुलपतिसमेत रहनुभएका प्रधानमन्त्री दाहाललाई बधाई तथा शुभकामना दिँदै विश्वविद्यालयको गतिविधिबारे अवगत गराएको हो ।
सो अवसरमा विश्वविद्यालयका पदाधिकारीले संसारकै ठूलो विश्वविद्यालयका रूपमा छवि बनाएको त्रिविलाई थप प्रवद्र्धन गर्न सरकारको ध्यानाकर्षण गराएका थिए । जवाफमा प्रधानमन्त्री दाहालले विश्वविद्यालयको छवि र गरिमालाई थप उचाइमा पु¥याउन आवश्यक सहयोग गर्ने प्रतिबद्धता जनाउनुभएको थियो ।
विश्वविद्यालयको चासोप्रति प्रधानमन्त्री अत्यन्तै सकारात्मक रहेको र सरकारले गर्नुपर्ने सबै खालका सहयोग गर्न उहाँले तत्परता देखाउनुभएको भेटपछि उपकुलपति खनियाँले सञ्चारकर्मीलाई जानकारी दिनुभयो ।
“संसारकै ठूलो विश्वविद्यालयप्रति सरकारको विशेष ध्यान जाओस्, विश्वविद्यालयमा पदाधिकारी नियुक्ति प्राज्ञिक दृष्टिकोणबाट होस्, त्यसका लागि प्रधानमन्त्रीबाट दलहरूसँग संयोजन गरी सकारात्मक सहयोग र सद्भाव प्राप्त होस् भनी अनुरोध गर्दा सबै विषयमा प्रधानमन्त्री सकारात्मक रहेको पायाँै”, उपकुलपति खनियाँले भन्नुभयो ।

काठमाडौँ, भदौ १२ गते । उपप्रधानमन्त्री एवम् गृहमन्त्री विमलेन्द्र निधिले प्रधानमन्त्री पुष्पकमल दाहालको विशेषदूतको रुपमा यही भदौ २ देखि ७ गतेसम्म गर्नुभएको भारत भ्रमणको बारेमा आज सदनलाई जानकारी गराउनुभएको छ ।

व्यवस्थापिका–संसद्को आजको बैठकमा उहाँले भन्नुभयो– “आफनो भ्रमणबाट दुई देशबीचको सम्बन्धलाई अझ सुदृढ तुल्याउन, सहकार्य र सहयोग विस्तार गर्न तथा उच्चस्तरीय भ्रमणको आदानप्रदान गर्न मद्दत पुगेको छ ।”

सरकारको गत साउन २७ गतेको निर्णयअनुसार उपप्रधानमन्त्री निधि प्रधानमन्त्री दाहालको विशेषदूतकारुपमा भारत भ्रमण गर्नुभई त्यहाँका राष्ट्रपति, प्रधानमन्त्री, विदेशमन्त्री, पूर्वप्रधानमन्त्रीलगायतका नेतासँग दुई देशबीचको सम्बन्धका बारेमा विचार विमर्श गर्नुभएको थियो ।

भारत भ्रमणका क्रममा राष्ट्रपति विद्यादेवी भण्डारीले भारतीय राष्ट्रपति प्रणव मुखर्जीलाई नेपालको राजकीय भ्रमणको लागि पठाउनुभएको पत्र हस्तान्तरण गरेको, नयाँ सरकारको प्राथमिकता संविधान कार्यान्वयन गर्नु रहेकोले सबै पक्षलाई सहमतिमा ल्याएर अघिबढ्ने प्रयास भइरहेको बारेमा पनि आफूले त्यहाँका नेताहरुलाई जानकारी गराएको उपप्रधानमन्त्रीले सदनलाई जानकारी गराउनुभयो ।

सो क्रममा उहाँले संविधान कार्यान्वयन गर्ने सिलसिलामा नेपालको संविधानअनुरुप सङ्घीय, प्रदेश र स्थानीय तहको निर्वाचनलाई पनि तोकिएको समयभित्रै गराउने विषयलाई पनि सरकारले प्राथमिकतामा राखेको बारे छिमेकीमुलुकका राजनेतालाई अवगत गराउनुभएको बताउनुभयो ।

भारतले गरेको उच्च आर्थिक प्रगतिबाट नेपाल पनि लाभान्वित हुन चाहेको, नियमित विकासका कार्यलाई सञ्चालन गर्न दुबै देशबाट आवश्यक प्रयासको आवश्यकता रहेको तथा सरकारले दुबै छिमेकीसँगको सम्बन्धलाई उच्च प्राथमिकता दिएको बारेमा पनि उपप्रधानमन्त्रीले भारतीय नेतासँग छलफल गरेको बताउनुभयो ।

भारतीय नेताले नेपालको आर्थिक र सामाजिक विकासमा भारतीय सहयोग र सद्भाव निरन्तर कायम रहेको प्रतिवद्धता व्यक्त भएको बताउँदै उहाँले दुबै देशका उच्चस्तरीय भ्रमणलाई सफल तुल्याउन हरसम्भव प्रयास हुने भारतीय पक्षबाट विश्वास दिलाइएको उल्लेख गर्नुभयो ।

बैठकमा गृहमन्त्री निधिले पछिल्लो समय काभ्रे, चितवन र बझाङ्मा भएको सवारी साधन दुर्घटनामा भएको जनधनको क्षतिको विवरण पनि प्रस्तुत गर्नुभयो । रासस