काठमाडौँ, साउन २४ गते । ‘बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास’ (बिम्स्टेक)को १५औँ मन्त्रीस्तरीय बैठक शुक्रबारदेखि राजधानीमा हुने भएको छ । प्रधानमन्त्री शेरबहादुर देउवाले उद्घाटन गर्नुहुने बैठकमा सदस्यराष्ट्रका विदेशमन्त्रीहरूको सहभागिता रहनेछ ।
मन्त्रीस्तरीय बैठकसँगै विदेश सचिवहरू सम्मिलित ‘उच्च अधिकारी बैठक’ (एसओएम) पनि हुनेछ । बैठकमा प्रबुद्ध व्यक्ति समूह (ईजीजी) गठन तथा सदस्यराष्ट्रबीच सम्पर्क सञ्जाल स्थापना र अन्य विविध विषयमा छलफल हुने परराष्ट्र मन्त्रालयले जानकारी दिएको छ ।
बैठकमा अध्यक्ष राष्ट्र रहेको नेपालले २०औँ बिम्स्टेक सम्मेलनको मितिसमेत प्रस्तावित गर्ने बताइएको छ । नेपालले नै आयोजना गर्ने २०औँ सम्मेलन यसै वर्ष हुनेछ । नेपालका तर्फबाट उपप्रधान तथा परराष्ट्रमन्त्री कृष्णबहादुर महराले अध्यक्षता गर्नुहुने बैठकमा बङ्गलादेश, भुटान, भारत र श्रीलङ्काका परराष्टमन्त्रीका साथै म्यानमार र थाइल्यान्डबाट उपविदेशमन्त्रीले सहभागिता जनाउनुहुनेछ ।
नेपालले पहिलोपटक बिम्स्टेक सम्मेलन आयोजना गर्न लागेको हो । दक्षिण तथा दक्षिणपूर्वी एसियाली देशबीच आर्थिक तथा कूटनीतिक सम्बन्ध विस्तार गर्न बनेको क्षेत्रीय सङ्गठन बिम्स्टेक सन् १९९७ मा स्थापना भएको हो ।
Post a Comment