काठमाडौं , वैशाख २८ गते । वरिपरि नेपालका प्रमुख ३
पार्टीका वडा कार्यालय छन् । पार्टीका झण्डा तोरण टाँगिएझैं टाँगिएका छन्
त्यही क्षेत्रमा खोलिएको एक किराना पसल अगाडि कृष्णकुमारी महर्जन नमुना
मतपत्र हेर्दै थिइन्, उनलाई चुनाव चिन्ह चिनाउन उनकी बुहारीले सघाइरहेकी
थिइन् ।
“यो सूर्य हो, घाम ! नेकपा एमाले पार्टीको
चुनाव चिन्ह,” कृष्णकुमारीकी बुहारी मनिता महर्जनले चर्किरहेको घाम र नजिकै
रहेको नेकपा एमालेको वडा कार्यालयलाई देखाउँदै आफ्नी सासुलाई भनिन्, “के
गर्नु पार्टी कार्यालयहरुको नजिकै बसेको भए पनि कसैले आमालाई कसरी भोट
हाल्ने भनेर सिकाएका छैनन् । उनीहरुले खाली आ–आफ्नो पार्टीको चिन्हमा भोट
हाल्नु है भने । आमाले पनि हुन्छ भन्नुहुन्थ्यो तर अहिले नमुना मतपत्र
देखाउँदा अलमलमा पर्नुभयो ।”
देशलाई चुनावी महोलले छोपिसक्दा र भोट हाल्न
२ दिनमात्रै बाँकी रहँदा अझै पनि काठमाडौंभित्रकै मतदाताहरुलाई भोट हाल्ने
तरिकाबारे थाहा छैन । कृष्णकुमारीजस्ता वृद्ध अवस्थाका मतदाताहरुलाई
पार्टीहरुले आफूलाई भोट हाल्न आग्रह गरे पनि यसबारे केही पनि सिकाएका छैनन्
।
“सबैजना मलाई नै भोट हाल्नुस् है आमा भन्दै
आए अहिले बुहारीले छाप हान्ने कागज देखाउँदा म अलमलमा पर्यो । यति धेरै
चिन्ह छ कुनै मादल, कुनै रुख, कुनै सेलरोटी, कुनमा हाल्ने हाल्ने भयो,”
कृष्णकुमारीले हाँस्दै भनिन् ।
कृष्णकुमारी बसेको घर पुग्नलाई दमकल चोक
झरेर मानेलाई दायाँ पारेर जाँदा नजाँदै कांग्रेसको ८ नम्बर वडाको सम्पर्क
कार्यालय छ, जहाँ मेयरका उमेदवार पनि बस्छन् । हामी पुगेको समयमा भने उनी
बुङ्मती कार्यक्रमको लागि पुगेका रहेछन् । कृष्णकुमारीको घरबाट १० पाइला
पनि नहिँड्दै नेकपा एमालेको कार्यालय पुगिन्छ भने १ मिनेट हिँड्यो भने
नेकपा माओवादीको सम्पर्क कार्यालय छ तर पनि उनलाई भोट हाल्ने तरिकाबारे
थाहा छैन ।
यता निर्वाचन आयोग भने आफूले मतदाता शिक्षा
अभियान चलाइरहेको र यो निकै प्रभावकारी भइरहेको दाबी गर्छ । अझ पार्टीहरुले
पनि मतदाता शिक्षा चलाइरहेकोले पनि मत बदर हुने सम्भावना कम भएको तर
अघिल्लो संविधान सभा चुनावको तुलनामा बढी मत बदर हुनेमा निर्वाचन आयोग
विश्वस्त छ ।
“हामीले अघिल्लो चुनावको तुलनामा बदर मतको
संख्या घटाउन सक्छौं भन्ने अवस्था नै छैन । पहिलेको तुलनामा अहिलेको मतपत्र
धेरै ठूलो पनि छ भने धेरै चिन्ह पनि छन् । तर हामी बदर मत घटाउने प्रयासमा
छौं र राजनीतिक पार्टीहरुले पनि हामीलाई यसमा सघाउने भनिरहनु भएको छ,”
निर्वाचन आयुक्त इला शर्माले भनिन् ।
बुधवारमात्रै पनि प्रमुख निर्वाचन आयुक्त
अयोधीप्रसाद यादवले राजनीतिक दलको चुनावी प्रचारको लागि समय बिहीबारदेखि
सकिने तर मतदाता शिक्षाको लागि समय अझै पनि बाँकी रहेको बताएका थिए ।
साक्षरता दर उच्च रहेको ललितपुरमै पनि मतदाता शिक्षा प्रभावकारी देखिएको छैन ।
“कोही पनि आएन मलाई भोट कसरी हाल्ने भन्ने
सिकाउनलाई । सबैजनाले मलाई यसमा भोट हाल्नु मात्रै भने । बुहारीले पनि मलाई
आइतबार छाप लगाउने कागज यो भन्दा ठूलो हुन्छ भनेको छ, म त जुनमा मन लाग्यो
त्यसमा छाप लगाएर आउँछु,” कृष्णकुमारीले भनिन् । - बाह्रखरीबाट
Post a Comment