उपाधिका लागि आर्मी र मनाङ भिड्दै

दमक: झापाको शिवसताक्षीमा जारी दोस्रो संस्करणको सताक्षी गोल्डकपको उपाधिका लागि बिहीबार मनाङ मस्र्याङ्दी क्लब र त्रिभुवन आर्मीबीच प्रतिस्पर्धा हँुदैछ । झिलझिलेको मैदानमा दुवै टोली उपाधि जित्ने लक्ष्यका साथ मैदानमा उत्रँदैछन् ।
मंगलबार भएको अन्तिम सेमिफाइनल खेलमा जित निकाल्दै मनाङले आर्मीसँगको उपाधि भेट पक्का गरेको हो । आयोजक सताक्षीधाम स्पोर्टिङ क्लबलाई २-१ गोलले पराजित गर्दै मनाङले फाइनल यात्रा तय गरेको हो । त्यस्तै झापा-११ लाई ३-० ले पराजित गर्दै आर्मीले फाइनलमा स्थान बनाएको हो । बुधबार भएको म्याच प्री-कन्फ्रेन्समा दुवै टोलीका कप्तानले एक अर्का टोलीको प्रशंसा गरे । मनाङका कप्तान अनिल गुरुङले आर्मी धेरै राम्रो टोली भएको बताए ।
आर्मी उत्कृष्ट टिम हो, पछिल्लो समय आर्मी निकै राम्रो फर्ममा देखिएको छ र टेक्निकल खेल पस्कँदै आएको छ', उनले भने । यस्तै आर्मीका कप्तान भरत खवासले मनाङमा राष्ट्रिय स्तरका खेलाडी रहेकाले जितका बारेमा अनुमान लगाउन नसकिने बताए । ‘दुवै टोलीमा सशक्त खेलाडी छन् । खेलको अन्तिम ह्विसल नबजेसम्म जित कसको हुन्छ थाहा हुन्न', खवासले भने ।
प्रतियोगिताका विजेताले नगद पाँच लाखसहित ट्रफी प्राप्त गर्नेछ भने उपविजेताले नगद दुई लाख ५० हजार प्राप्त गर्नेछ ।