प्रथम सृजना आमन्त्रण महिला तथा पुरुष भलिबल प्रतियोगितामा नेपाली सेनाको त्रिभुवन आर्मी क्लबले विजयी सुरुवात गरेको छ ।
पोखरा रंगशालमा शनिबार भएको उद्घाटन खेलमा आर्मीले सशस्त्र प्रहरी बलको एपीएफ क्लबलाई ३-० को सोझो सेटमा पराजित गर्यो ।
पहिलो सेटमा २३-१९ को जित निकालेको आर्मीले दोश्रो सेटमा कडा प्रतिस्पर्धा गर्नु पर्यो । दोश्रो सेटमा आर्मीले एपिएफ माथी २९-२७ को जित निकाल्यो भने तेश्रो सेटमा २५-२१ को जित निकाल्दै खेललाई आफ्नो पक्षमा पार्यो ।
यसअघि प्रतियोगिताको सांसद रविन्द्र अधिकारीले रेफ्री नारायण बहादुर भण्डारीलाई भलिबल प्रदान गर्दै उद्घाटन गरेका थिए । विकास समितिका सभापति समेत रहेका अधिकारीले पोखरालाई खेलकुद र खेल पर्यटनको राजधानी बनाउन लागि पर्ने प्रतिवद्धता जनाए ।
अर्का सांसद सारदा शर्माले पोखराको रङ्गशालालाई अन्तराष्ट्रिय रङ्गशालाको रुपमा निर्माण गर्न आफु लागि पर्ने बताइन् ।
माघ २९ गते सम्म संचालन हुने प्रतियोगितामा महिला र पुरुष दुवैतर्फ नेपालका पाँच र भारतको एक गरी ६/६ टिमको सहभागिता रहेको छ ।
प्रतियोगितामा महिला र पुरुष दुवैलाई समान पहिलो, दोश्रो र तेश्रो हुनेलाई क्रमशः १ लाख ५५ हजार ५सय ५५, ७७ हजार ७ सय ७७ र ३३ हजार ३ सय ३३ नगद प्रदान गरिने आयोजक पश्चिमाञ्चल भलिबल संघका अध्यक्ष याम बहादुर गुरुङले जानकारी दिए ।-अनलाइनखबर
Post a Comment