नेपाल एयरलाइन्सका दुई नयाँ अमेरिकी जहाज ०७४भित्रै

काठमाडौं, माघ १७ गते । नेपाल बायुसेवा निगमले नयाँ जहाज खरिदका लागि अमेरिकी कम्पनी एएआर कर्पाेरेसनलाई १० करोड रुपैयाँ बैना दिने भएको छ ।



शुक्रबार जहाज खरिदका लागि एएआर कम्पनी र बायु सेवा निगमबीच सम्झौतापत्रमा हस्ताक्षर भएको छ । सम्झौताअनुसार दुई वटा विमान खरिदको लागि बायुसेवा निगमले तत्काल १० करोड रुपैयाँ बैना दिँदैछ ।

बायुसेवा निगमका सहायक प्रवक्ता शैलेश कंसकारले भने ‘शुक्रबार दुई नयाँ जहाज खरिदका लागि हामीले एएआर कर्पाेरेसनसँग सम्झौता गरेका छौ, यसै अनुरुप तत्काल १० करोड रुपैयाँ बैनाको रुपमा दिदैँछौ ।’

बायु सेवा निगमले यसरी बैना दिनको लागि यसवर्षको बजेटमा १२ करोड रुपैयाँ व्यवस्था गरेको थियो ।

निगमले दुबै जहाज २०७४ भित्रै ल्याउने तयारी गरेको छ । सहायक प्रवक्ता कंसकार भन्छन् ‘२०७४ को अन्तसम्ममा दुबै जहाज ल्याउने सोचमा छौ, एउटा जहाज २०१७ को सेप्टेम्बर र अर्काे २०१८ को मार्चसम्ममा ल्याउँछौ ।’

यसरी जुटाउँदैछ स्रोत

जहाज खरिदका लागि निगमले विभिन्न बित्तीय सस्थासँग ऋण लिने भएको छ । सञ्चय कोषसंग भने निगमले २५ अर्ब ऋण सम्झौता गरिसकेको छ । कोषसँग निगमले यो सम्झौताका लागि अर्थ मन्त्रालयले जमानत बस्ने सहमति पनि दिइसकेको छ ।

दुइटा वाइडबडी विमान खरिदका लागि निगमले असोज पहिलो साता आह्वान गरेको खरिद प्रक्रियामा सहभागी भएका ११ वटा कम्पनीमध्येबाट माघ १ गते एएआर करर्पोरेसन छानिएको थियो ।

अहिले निगमसँग वाइडबडी जहाज छैन । वाइडबडी ल्याएर लामो दूरीमा उडाउने निगमको योजना छ ।-अनलाइनखबर