काठमाडौं , असोज ९ गते । नेपाल राष्ट्र बैंकले दसैंका लागि आजबाट बैंक तथा वित्तीय संस्थाहरुलाई नयाँ नोट उपलब्ध गराउन थालेको छ । बैंकहरुले भोलीबाटै नयाँ नोट सर्वसाधारणलाई उपलब्ध गराउने छन् ।
राष्ट्र बैंकको कार्यालयबाट भने सर्वसाधारणले असोज १६ गतेबाट नयाँ नोट साट्न सक्छन् । बैंक तथा वित्तीय संस्थाहरुलाई आजदेखि आउँदो १४ गतेसम्म नयाँ नोट उपलब्ध गराइने छ ।
'सर्वसाधारणले लामो लाइन बस्नु नपरोस् भनेर यसपाली कुपन वितरण गरिने छ' राष्ट्र बैंकका सहप्रवक्ता राजेन्द्र पण्डितले बिजमाण्डूसँग भने, 'सर्वसाधारणलाई यसपाली पोहोरभन्दा वढि नोट पनि उपलब्ध गराइने छ ।'
राष्ट्र बैंकले एक जनालाई ३७ हजार रुपैयाँ नयाँ नोट उपलब्ध गराउने छ । नोट थापाथलीस्थित कार्यालयसँगै क्षेत्रीय कार्यालयबाट उपलब्ध गराइने पण्डितले जानकारी दिए ।
राष्ट्र बैंकले पाँचदेखि १०० रुपैयाँसम्मका नोटहरु दुई दुई बिटाका दरले उपलब्ध गराउने छ । यसो हुँदा एक जनाको भागमा ३७ हजार रुपैयाँ सटही सुविधा हुन्छ । गत बर्ष एक जनालाई २२ हजार रुपैयाँ सटही सुविधा दिइएको थियो ।
Post a Comment