डोल्पा,वर्षा यामको सुरुवात सँगै डोल्पा सदरमुकाम दुनैमा बाढीको उच्च जोखिम रहेको छ । सदरमुकामको छेउमै पर्ने ठूलो भेरीमा पानीको बहाव औसत भन्दा धेरै बढेपछि सदरमुकामनै उच्च जोखिममा परेको हो ।
नदी किनार आसपासमा रहेका घर बाढीको उच्च जोखिममा रहेका छन् । पानी पर्दा बाढीबाट ज्यान जानसक्ने डरले सर्वसाधारण राति सुःखसँग सुत्न नपाएको स्थानीयवासीको गुनासो छ ।
साउन र भदौ दुई महिनामा रातभर नदीको गड्याङगुडुङले निन्द्रा बिथोलिने गरेको स्थानीयवासी ओम मगरले बताउनुभयो ।
हरेक वर्ष वर्षा यामसँगै ठूलो भेरीमा बढ्ने नदीको बहावले आसपासका दर्जनौँ घरमा क्षति पु¥याउने गरेको मगरले बताउनुभयो ।
नदी तटबन्धनका लागि वार्षिक लाखाँै रुपैयाँ बराबरको रकम जिल्ला विकास समितिलगायत विभिन्न निकायले विनियोजन गर्ने गरेपनि यसको सही सदुपयोग हुन नसकेको स्थानीय बासिन्दाले बताए ।
ठूलो भेरीको मार्गमा रहेको सदरमुकाम दुनै कुनै पनि बेला बाढीको चपेटामा पर्ने निश्चित रहेकाले सतर्क रहनुपर्ने स्थानीयवासी लोकेश खत्रीले बताउनुभयो । रासस
Post a Comment