काठमाडौं , कार्तिक १६ गते । नेपाल मेडिकल काउन्सिलले स्वदेश र विदेशमा अध्ययन गरेका डाक्टरी विद्यार्थीहरुको लाइसेन्सिङ परीक्षामा सहभागिताका लागि लागू गर्न लागेको फरक फरक व्यवस्था कार्यान्वयनमा नल्याउने भएको छ।
काउन्सिलले अबदेखि नेपालमा एमबिबिएस वा बिडिएस गरेका विद्यार्थीले ६ महिना इन्टर्नसिप र विदेशमा अध्ययन गरेको हकमा १ वर्ष इन्टर्नसिप गरेपछि मात्र लाइसेन्सिङ परीक्षामा सहभागि हुन पाउने व्यवस्था लागू गर्न लागेको थियो। तर, यो विषयमा विरोध आएपछि काउन्सिलले पुरानै व्यवस्था अनुसार जाने निर्णय गरेको हो।
काउन्सिलले स्वदेश र विदेशमा अध्ययन गरेका विद्यार्थीहरुलाई समान मापदण्ड नै लागू गर्ने निर्णय गरेको काउन्सिलका रजिष्ट्रार डा दिलिप शर्माले जानकारी दिए। उनका अनुसार अब स्वदेश र विदेशमा पढेकाले ६ महिना इन्टर्नसिप गरेपछि काउन्सिलको लाइसेन्स परीक्षामा सहभागि हुन पाउने छन्। ‘बिहीबार बसेको बैठकले फरक फरक मापदण्ड लागू नगर्ने निर्णय गरेको हो,’ उनले भने, ‘यो निर्णय स्विकृतीका लागि स्वास्थ्य तथा जनसंख्या मन्त्रालयमा पठाउन लागिएको छ।’
मन्त्रालयबाट स्विकृती भएर आएसँगै काउन्सिलले स्वदेश र विदेशमा अध्ययन गरेका विद्यार्थीलाई समान मापदण्ड अनुसार नै लाइसेन्सिङ परीक्षा लिने छ। - स्वास्थ्य खबर पत्रिकाबाट
Post a Comment