पहिलो चरणको चुनाव: मौन अवधि सुरु

काठमाडौंँ, मङ्सिर ८ गते ।  पहिलो चरणमा मङ्सिर १० गते हुने प्रतिनिधिसभा तथा प्रदेशसभा सदस्यको निर्वाचनका लागि उम्मेदवारले प्रसारप्रसार गर्ने अवधि बिहीबारबाट समाप्त भएको छ ।  आयोगका प्रवक्ता नवराज ढकालले राजनीतिक दल तथा उम्मेदवारले आफ्नो घोषणापत्रअनुसार मतदातासँग मत माग्ने अवधि सकिएकाले अब मतदाताले मौन अवधिमा कुन राजनीतिक दल र उम्मेदवारलाई मत दिने भनेर निर्णय गर्ने समय सुरु भएको बताउनुभयो ।
प्रवक्ता ढकालले निर्वाचनको मौन अवधि सुरु भएकाले अब उम्मेदवार आफैँ वा अरू कसैले पनि कुनै पनि माध्यमबाट निर्वाचन प्रचारप्रसार गर्न पाइँदैन र आचारसंहिताविपरीत कसैले निर्वाचन प्रसारप्रसार गरेमा वा मतदातालाई प्रभाव पार्ने कार्य भएमा निर्वाचन ऐनअनुसार आवश्यक कारबाही हुने बताउनुभयो ।
यसैगरी उपदफा ६ मा उम्मेदवार वा निर्वाचन प्रतिनिधि वा अन्य कुनै व्यक्तिले आयोगको मर्यादामा प्रतिकूल असर पुग्ने गरी प्रचारप्रसार गर्न नहुने उल्लेख छ ।  यस्तो कार्य गरेको पाइएमा मुख्य निर्वाचन अधिकृत, निर्वाचन अधिकृत वा अनुगमनकर्ताले ठाउँका ठाउँ २५ रुपियाँसम्म जरिवाना गर्न सकिने व्यवस्था रहेको जानकारी आयोगले दिएको छ ।
चारवटा चिह्नमा मत
मङ्सिर १० र २१ गते हुने निर्वाचनमा मतदाताले तीन थरीका मतपत्रमा चारवटा निर्वाचन चिह्नमा मत सङ्केत गर्नुपर्नेछ ।  मतदानको दिन निर्वाचन केन्द्रमा पुगेपछि मतदाताले सुरुमा प्रतिनिधिसभा सदस्यका लागि हरियो रङमा निर्वाचन चिह्नहरू रहेको मतपत्र र त्यसपछि कालो रङका निर्वाचन चिह्न रहेका मतपत्रमा प्रदेशसभा सदस्यका लागि आफूलाई मन परेका उम्मेदवारको चिह्नमा मत सङ्केत गर्नुपर्नेछ ।
यसपछि समानुपातिक निर्वाचन प्रणालीतर्फ एउटा पानामा माथिल्लो भागमा रहेको मतपत्र–१ मा रातो रङमा रहेका दलका निर्वाचन चिह्नमा प्रतिनिधिसभा सदस्य र सोही पानाको तल्लो भागमा रहेको मतपत्र–२ मा रातो रङमा रहेका दलका निर्वाचन चिह्नमा प्रदेशसभा सदस्यका लागि मतदाताले मत सङ्केत गर्नुपर्छ ।
त्यसरी मत सङ्केत गर्दा मतदाताले समानुपातिकतर्फको मतपत्रको माथिल्लो भागमा रहेका दलका निर्वाचन चिह्नहरूमध्ये आफूलाई मन परेको एक दलको निर्वाचन चिह्नमा प्रतिनिधिसभा सदस्यका लागि र तल्लो भागमा रहेका दलका निर्वाचन चिह्नमध्ये आफूलाई मन परेको एक दलको निर्वाचन चिह्नमा प्रदेशसभा सदस्यका लागि गरी दुईवटा निर्वाचन चिह्नमा स्वस्तिक छाप लगाई मत सङ्केत गर्नुपर्नेछ ।