चितवन, माघ १७ गते । सूर्योदय र सूर्यास्त हेर्नका लागि चितवनको सौराह पुग्ने धेरै छन् । तर, नाराणगढसँगैको नारायणी नदी क्षेत्रबाट पनि सूर्योदय र सूर्यास्त कम्ति मनोरम देखिँदैन ।
यो समयमा रंगीन किरणले नारायणी नदीलाई यति सुन्दर बनाइदिन्छ कि मानौं त्यहाँ कलाकारले सुनौलो रंग छरिदिएका छन् । यो समय प्रकृतिलाई सूर्यको किरणले लाली लगाएर सजाएजस्तै गरिदिन्छ ।
नारायणी नदी किनारबाट विहान र बेलुका देखिने यस्तो दृश्यले जो कोहीको मन लोभ्याउनेमा आशंका रहँदैन । प्रकृतिको अनुपम छटालाई नियालेर शान्त भएर बगेको नदीमा समय बिचरण गर्न चाहानेका लागि एउटा खास पल यहाँ जन्मन सक्छ ।
नदीको छेवैबाट बहने चिसो बताससँगै शान्त वातावरणमा रमाउनेहरुका लागि नारायणी किनार उत्तम विकल्प बन्दैछ ।
यहाँ आजभोलि बिहान र बेलुकीको लोभलाग्दो सूर्योदय र सूर्यास्त हेर्नेहरुको भीड पनि देखिन्छ । नदी किनारमा मात्रै होइन, नारायणी पुलमै बसेर पनि नदीमा छल्किएको सुनौलो किरणको मज्जा लुट्नेहरु प्रशस्तै देखिन थालेका छन् ।
प्रकृतिको एउटा उत्कृष्ट बनोटको नमूना नदी किनारबाटै देखिन्छ । अब सूर्योदय र सूर्यास्त हेर्न सौराह पुग्नेले एक साँझ नारायणी किनारमा बिताएर हेर्ने कि ?
नारायणी नदी किनारबाट देखिएको सूर्योदय
नारायणी नदी किनारबाट देखिएको सूर्यास्त
श्रीधर पौडेल,अनलाइनखबर
Post a Comment