पत्रिकामा विज्ञापन गरेर करोड ठगी, अपार्टमेन्टबाट प्रहरी हिरासतमा

काठमाडौं , माघ १७ गते । एक दम्पतिले ठगी गर्नकै लागि काठमाडौंमा कम्पनी खोले । उनीहरूले खोलेको कम्पनी, कम्पनी रजिष्ट्रार कार्यालयमा दर्ता छ । कम्पनीको उद्देश्यमा राखिएको छ, ‘विदेशमा भएको विभिन्न डकुमेन्ट तथा अनुवादको काम अनलाइनमार्फत गर्ने ।’ त्यतिमात्र नभएर उक्त दम्पतिले शाखा कार्यालय खोल्न दिनेसमेत उद्देश्यमा उल्लेख गरेका छन् ।

ठग्ने उद्देश्यले कम्पनी खोलिएको थियो । शाखा कार्यालय खोल्न लगाइयो, ८ जनाबाट करोड रकम उठाएर दम्पति सानदार तरिकाले अपार्टमेन्टमा बस्न थाले । शाखा कार्यालय खोलेका पीडितहरू कार्यालयको भाडा तिर्न नसकेर प्रहरीमा पुगे ।

प्रहरीले सर्लाही हरिवन नगरपालिका–४ सासापुर घर भई काठमाडौंको सनसिटी आपर्टमेन्टमा बस्ने २० वर्षीया अस्मिता घिमिरे र उनका पति भारतीय नागरिक ३४ वर्षीय विकास द्विवेदीलाई नियन्त्रणमा लिएर अनुसन्धान गर्दा यो तथ्य खुलेको हो ।

यो दम्पतिले ठगी गर्नकै लागि आईटी कम्पनी खोलेर राष्ट्रिय स्तरमा दैनिक पत्रिकामा विज्ञापन गर्ने गरेको थियो । महिनाको ६ लाख रुपैयाँ कमाइ हुने आश्वासनका साथ पत्रिकामा विज्ञापन छपाएर उनीहरूले ८ जनाबाट १ करोड ३५ लाख ठगी गरेको प्रहरी अनुसन्धानबाट खुलेको छ ।

‘भि इन्फोटेक प्रालि’ नामक कम्पनी खोलेर घिमिरे दम्पतिले महिनाको ६ लाख कमाउन शाखा खोलेर आफैं काम गर्नुपर्ने विज्ञापन गरेका थिए । ११ महिनाको बैंक ग्यारेन्टी भन्दै उनीहरूले पैसा उठाएका थिए । प्रहरीका अनुसार धरौटी भन्दै उनीहरुले एउटा शाखा खोलेको ५ लाख ६० हजार रुपैयाँ लिएका थिए ।

महानगरीय प्रहरी परिसर ललितपुरका प्रवक्ता डीएसपी ईश्वर कार्कीका अनुसार पीडितको उजुरीका आधारमा उनीहरू पक्राउ परेका हुन् । “असोजमा विज्ञापन गरेर त्यति बेलादेखि नै ठगी गर्न थालेछन्,” डीएसपी कार्कीले थपे, “पीडितलाई काठमाडौं र ललितपुरमा कार्यालय खोल्न लगाए, कार्यालय खोलियो, कर्मचारी पनि राखियो । तर काम भने दिइएन । लामो समयसम्म काम नपाएपछि पीडितहरू प्रहरीमा आए ।”

महिनाको ६ लाख कमाइ हुने भन्दै आश्वासन देखाएर ८ जनालाई ठगी गर्दै भव्य अपार्टमेन्टमा बस्ने घिमिरे दम्पति अहिले महानगरीय प्रहरी परिसर ललितपुरको प्रहरी हिरासत कक्षमा छन् । प्रहरीले उनीहरूविरुद्ध ठगी मुद्दा दर्ता गरी अनुसन्धान अघि बढाएको छ । - डिल्ली पाण्डे , बाह्रखरी