सशस्त्र प्रहरीको योजना- ग्यास बुलेटमा लगानी, उपचार कोष स्थापना

१६ औं स्थापना दिवसको अवसरमा हलचोकमा विशेष समारोह

सशस्त्र प्रहरी महानिरीक्षक दुर्जकुमार राई

काठमाडौं,कार्तिक ११ गते । सशस्त्र प्रहरी बलले बिहीबार बिहान प्रधान कार्यालय हलचोकमा विशेष कार्यक्रम आयोजना गरी आफ्नो १६ औं स्थापना दिवस मनाएको छ । सरकारले २०५७ सालमा सशस्त्र प्रहरी बल स्थापना गरेको थियो । तात्कालिन अवस्थामा माओवादी जनयुद्ध चर्किदै गएपछि नेपाली सेना र नेपाल प्रहरीका विचमा अर्को एक शक्ति खाँचो महसुस गरी दुवै सुरक्षा निकायका केही जनशक्ति ल्याई सशस्त्र प्रहरी बल गठन गरिएको थियो ।

१६ औ स्थापना दिवसको अवसरमा आयोजित विशेष कार्यक्रमलाई सम्बोधन गर्दै सशस्त्र प्रहरी महानिरीक्षक दुर्जकुमार राईले सधैं आफ्नो दायित्व पूरा गर्न मातहतका सुरक्षा अधिकारीलाई निर्देशन दिए । परिवर्तित सन्र्दभमा चुनौतिहरु पनि थपिदै जाने भन्दै उनले जस्तोसुकै अवस्थामा पनि विचलित नभई सुम्पिएको दायित्वमा खरो उत्रिन निर्देशन दिए ।

महानिरिक्षक राईले सशस्त्र प्रहरीले आफ्नो अस्पताललाई सुविधा सम्पन्न बनाउन उपकरणहरुको खरिद प्रक्रियालाई चाँडै नै अघि बढाउने बताए । उनले मुटु, हेपाटाइटिस, क्यान्सरलगायत रोग लागेका सशस्त्र प्रहरीका बहालवाला र अवकास प्राप्त सुरक्षा अधिकारीको उपचारमा आर्थिक सहयोग गर्न छुट्टै कोष स्थापना गर्ने घोषणा पनि गरे ।

उनले सरकारको निर्देशन अनुसार सशस्त्र प्रहरी बलले पेट्रोलपम्प तथा ग्यास स्टेसन निर्माण गरी बुलेट तथा ट्यांकरको क्षेत्रमा थप लगानी गर्न लागेको जानकारी पनि दिए ।

कार्यक्रममा वर्षभरी उत्कृष्ट काम गर्ने सशस्त्र प्रहरी तथा गुल्म लगायतलाई पुरस्कृत गरिएको थियो ।-अनलाइनखबर