काठमाडौं , असोज २२ गते । नेपाल यातायात व्यवसायी राष्ट्रिय महासंघले दसैँका लागि घर जाने यात्रुको संख्या बढेपछि करिब दुई हजार गाडी थप गरेको छ । महासंघले फूलपातीदेखि नवमीका दिनसम्म बाहिर जाने यात्रुको संख्या दैनिक करिब एक लाख पुग्ने अनुमान गरेर गाडी थप गरेको हो ।
दसैंका अवधिमा करिब २० लाख सर्वसाधारण काठमाडौँ उपत्यकाबाट बाहिरिने अनुमान गरिएकामा अहिलेसम्म करिब १६ लाख बाहिरिएको महासंघले जनाएको छ । महासंघका कावा अध्यक्ष डोलनाथ खनालले सामान्य अवस्थामा भन्दा अहिले गाडी चढ्ने यात्रुको चाप बढेका कारण थप गरिएको जानकारी दिँदै दसैँका लागि सबै गाडीले ओहोरदोहोर ३५/३६ हजार ट्रिप गर्नुपर्ने बाध्यता रहेको बताए। महासंघले टिकटको समस्या नरहेको जनाए पनि बल्खु, कलंकी, बालाजु बाइपास, कोटेश्वरलगायत नाकामा घर जान हिँडेका यात्रुको चहलपहल छ । उनीहरुले सजिलै टिकट प्राप्त गर्न नसकेको गुनासो गरेका छन् ।
रासस
Post a Comment