राहतको बाख्राबाट हैजा फैलियो

हेटौँडा, १७ जेष्ठ गते ।'  टिस्टुङ–५ का रामकृष्ण गोले आफ्ना २१ वटा बाख्रा मरेपछि चिन्तित छन् । भूकम्पपछि उनलाई एक गैरसरकारी संस्थाले चारवटा बाख्रा राहत स्वरूप सहयोग गरेको थियो । ‘त्यही राहतमा पाएका बाख्रा बिरामी पर्न थालेपछि घरका बाख्रा पनि बिरामी हुन थाले, अहिले खोरै नै रित्तो भएको छ', रामकृष्णका छोरा सुजनले भने, ‘भूकम्पले घर भत्कायो, राहतमा पाएका बाख्राले गोठै रित्यायो ।'

 

भूकम्पपीडितलाई बाहिरी जिल्लाबाट स्वास्थ्य चेकजाँच नगरी आफूखुसी ल्याएर बाँडेको राहतका बाख्राबाट पीपीआर रोग फैलिएको जिल्ला पशुसेवा कार्यालयको अनुमान छ । भेडा बाख्रको हैजासमेत भनेर चिनिने पीपीआर रोग नियन्त्रणका लागि कार्यालयले जिल्लाभरका बाख्रालाई पीपीआरविरुद्धको भ्याक्सिन लगाउन सुरु गरेको छ । पशुसेवा केन्द्र पालुङ (क) का पशु विकास अधिकृत महेन्द्रप्रसाद भण्डारीले भने, ‘छ हजार भ्याक्सिन आएको छ, सबै क्षेत्रमा पुर्‌याउन सकिएको छैन ।' पालुङ केन्द्रअन्तगर्तका क्षेत्रमा मात्र ७८ हजार बाख्रा रहेको उनले बताए ।

 

टिस्टुङसँगै हेटौँडाको पदमपोखरी, हटिया, आमभञ्ज्याङ, सुकौरा र हाँडीखोला गाविसमा धमाधम बाख्रा मर्न थालेपछि पशुसेवा कार्यालयले जिल्लाभरका १६ वटा सेवा केन्द्रमार्फत् पीपीआरविरुद्ध भ्याक्सिन लगाइरहेको कार्यालय प्रमुख डा.रामप्रकाश प्रधानले बताए । एक महिनाअघि पदमपोखरीका किसानले पालेका बाख्रामा पीपीआर रोगको लक्षण देखिएको उनले बताए । ‘पदमपोखरीमा धमाधन बाख्रा मर्न थालेपछि हामीले तत्कालै पीपीआरविरुद्ध भ्याक्सिन लगाउन सुरु गर्‌यौं, त्यस क्षेत्रमा रोग नियन्त्रणमा आइसकेको छ', प्रधानले भने, ‘तर अन्य क्षेत्रमा पनि रोग फैलिएकाले नियन्त्रणमा लिन समस्या परेको छ ।'

 

बाख्रा मर्नुको कारण पत्ता लगाउन रोगी बाख्राको रगत परीक्षणका लागि केन्द्रीय पशुरोग अन्वेषण प्रयोगशाला काठमाडौं पठाइएको जिल्ला पशुसेवा कार्यालयका डा.सञ्जिवकुमार ठाकुरले बताए । पीपीआर रोग लागेपछि बाख्रामा कडा ज्वरो, पखाला, मुखमा घाउ, सिंगान बग्ने र झोक्राएर मर्ने उनले बताए । ‘रोग लागिसकेका बाख्रा भ्याक्सिन लगाए पनि १० प्रतिशत मात्र बाँच्ने सम्भावना हुन्छ', उनले भने ।

• अन्नपुर्ण पोस्ट बाट